夏日熱辣辣,除咗要搽足防曬,喺買衫嘅時候亦會選擇透氣舒適嘅質地。所以今日嘅主角就係蕾絲啦~
其實蕾絲一啲都唔難搭配,最百搭嘅蕾絲色係白色、米白色、黑色、裸粉色等等。由於蕾絲本身已經係夠花俏搶眼嘅單品,所以喺上衣同下身嘅搭配上選擇簡單穿搭即可。
小編夏天最怕癡笠笠嘅悶熱感,想著得清涼啲但又怕被曬到燶,所以蕾絲衫係夏天出門必備~ 就等小編教大家點樣襯出優雅輕柔嘅蕾絲穿搭啦 !
上衣建議搭配
簡單的白色,黑色,或者任何素啲嘅單色上衣,或者吊帶背心都可以
下身建議搭配
搭配半身裙,時尚感十足嘅同時帶點不可抵擋嘅甜美。而且質地透薄,帶點心機小性感~
唔鍾意太淑女嘅女仔亦可以搭配牛仔褲,襯出輕鬆隨性嘅風格~
蕾絲打底衫
蕾絲打底衫可以拯救衣櫃入面好多壓箱底嘅長年閑置單品。恤衫、T-Shirt……呢類基本單品著得多會厭,不如加件蕾絲打底衫再試試?嘩 ! 即刻唔同感覺,好似買咗另一件衫咁 !
領口開得太低嘅連身裙,絞盡腦汁都唔知入面可以著咩内衣?塞一件蕾絲打底衫喺入面就搞掂!
蕾絲長罩衫
長罩衫真係好好用,可以隱約咁遮住小粗腿同埋大pat pat !配上短褲就可以著出逆天大長腿,擁有model身材~
蕾絲短罩衫
任何你覺得太性感、你男朋友同你媽媽唔比著出街嘅吊带、抹胸、小背心,套上蕾絲罩衫就唔使驚太性感又怕走光,可以瞬間變優雅,仙氣十足,影相超級上鏡 !
想整體造型增加層次感同女人味嘅 ,就喺素色上衣上面加上半透感嘅蕾絲細肩背心~
大家快啲喺今個夏天試下蕾絲穿搭啦 !
如果你都想分享你嘅美容、時尚、旅行、運動心得,請將投稿文章連同不多於100字個人簡介同埋近照一張,電郵到: editor@homita.com.hk,文章經小編篩選後更有機會刊登喺我哋FB專頁,一經入選我哋會支付相應稿酬,仲唔快啲來投稿?
Author Information
You May Also Like